Ҧхынҷкәынмза 12 рзы Аҟәа имҩаҧысит Аҧсны Аҳәынҭқарра Аекономика аминистрра 25 шықәса ахыҵра иазкыз аҭҵаарадырра-практикатә конференциа.
Аконференциаҟны тема хадақәаны иҟалеит амилаҭтә економика аҭоурыхтә аспектқәа, ҳазҭагылоу аамҭа аҭахрақәеи аҧсуа економика аҧхьаҟатәи аҧеиҧши, аиҳабыра рекономикатә блок аусура ахаҭабзиара аиҕьтәреи аҳәынҭқарратә економикатә политика анагӡареи.
Аекономика аминистр Адгәыр Арӡынба аконференциа иалахәыз аҧсшәа раҳәаны, аконференциа шеиҿкаахо атәы далацәажәеит.
«Бзиала шәаабеит ҳаҭыр зқәу аколлегацәа! Иахьатәи арыцхә дууп ҳара ҳзы – 25 шықәса ҵит Аҧсны Аҳәынҭқарра Аекономика аминистрра аҧҵоуижьҭеи. Иахьатәи арыцхә ҳара баша иазгәаҳҭо акәымкәа, шәаргьы ҳаргьы аус еицаҳурц ҳаӡбеит. Иазгәаҳҭоит Аҧсны аҧсҭазаара ахаҭабзиара ҳаракхар иахьынӡахәҭоу. Ҳара аҭҵаарадырра-практикатә конференциа амҩаҧгара еиҕьуп ҳәа иалаҳхит избанзар, абасала еиҳа аицәажәара, 25 шықәса рыҩныҵҟала иҟаҵоу азы ҳгәаанагарақәа реибыҳәара ҳалшоит азы. Аекономика аминистрраҟны иҟаҵоу амацара акәымкәа, абри аамҭа зегьы иалагӡаны Аҧсны аекономикаҟны имҩаҧысуаз, иахьа имҩаҧысуа, абри аан аҭҵаарадырра рольс инанагӡаз, аҧхьаҟа иҟаҵатәу уҳәа абас еиҧш иҟоу азҵаарақәа ҳрылацәажәап. Аҧхьаҟа ҳҿаҧхьа аус дуқәа шьҭоуп, ара итәоу сара саасҭагьы ирдыруеит ҳтәылаҟны иҟоу апроблемақәа», - иҳәеит Адгәыр Арӡынба.
Аконференциаҟны Аҧсны Ахада Рауль Ҳаџьымба ихьӡала адныҳәаларатә шәҟәы даҧхьеит Ахада Иадминистрациа Анапхгаҩы ихаҭыҧуаҩ Адгәыр Лышәба. Иара убас Адгәыр Лышәба даҧхьеит азанааҭтә ныҳәа - Аекономист имш ашьақәыргыларазы Ахада Иусҧҟа атекст.
Аекономика аминистр Адгәыр Арӡынба даҧхьеит аконференциахь изымааз Аҧсны аекономикеи астатистикеи рзы актәи аминистр Даур Барганџьиа ихьӡала адныҳәалара.
«Ҳаҭыр зқәу аколлегацәа, аҩызцәа!
Аҧсны Аџьынџьтәылатә еибашьра ашьҭахь, Аиааира дуӡӡа ашьҭахь, 25 шықәса раҧхьа иаҧҵан Аекономика аминистрра, усҟан иара Аекономикеи астатистикеи рминистрра ахьӡын. Ари аамҭа хьанҭан, хымҧада, зегьы ҿыцны ихацырктәын.
Асоветтә аамҭазы ас еиҧш Аминистрра ыҟаӡамызт. Апостсоветтә аамҭазгьы аџьырмыкьатә еизҟазаашьақәа рыҿиара, Аҳәынҭплан аҭыҧан аусбарҭа ҿыцқәа рышьақәгылара ианалагоз ауп. Ҿыц аҧҵара ҳалагеит аколлективқәа, еиҳаракгьы аентузиазм ала.
Ихадароу уснагӡатәны ҳҿаҧхьа иқәгылан 1994 шықәсазы Аҧсны Аекономика аҿиара раҧхьатәи азҧхьагәаҭа ашьақәыргылара. Даара иуадаҩын, аха уи азҧхьагәаҭа азырхиан. Имариамызт аекономикатә рбагақәа рзы астатистикатә ҟаҵарбақәа риура. Аҵыхәтәаны, ҳагханы, лаҵарамза-рашәарамзазы, ишьақәыргылан раҧхьатәи 1994 шықәсазтәи Аҧсны Аҳәынҭқарра асоциалтә-економикатә ҿиара азҧхьагәаҭа.
Ишәыдысныҳәалоит, ҳаҭыр зқәу аколлегацәа зегьы, ари амш, ишәзеиҕьасшьоит аихьӡарақәа, ақәҿиарақәа!», - иҳәеит, ҷыдала, Даур Барганџьиа ишәҟәы аҟны.
