АҦСНЫ АҲӘЫНҬҚАРРА
АЕКОНОМИКА АМИНИСТРРА
MINISTRY OF ECONOMY
OF THE REPUBLIC OF ABKHAZIA

Аекономика аминистрраҟны Италиантәи аделегациа рыдыркылеит

9 November 2018

Абҵарамза 9 рзы Аҧсны Аҳәынҭқарра Аекономика аминистрраҟны имҩаҧысит Италиа анаплакҩцәа рҧылара. Аделегациа Аҧсныҟа иааит ареспублика аинвестициатә лшара аҭҵааразы.

Аекономика аминистр ихаҭыҧуаҩ Баҭал Ҭарба асасцәа бзиала шәаабеит ҳәа раҳәаны, иҭабуп ҳәа ахиҳәааит Аҧсны иарҭо азҿлымҳара. Уи иаҵшьны иҳәеит Аҧсни Италиеи рыбжьара традициала аҭоурыхтә еимадарақәа шрыбжьоу.

Италиатәи аделегациа ахада иазгәеиҭеит Италиа ааглыхратә мыругақәа рҭыжьразы аҩбатәи апозициа шамоу Европа (Германиа анаҩс), Италиа аҩада-мрагыларатәи ахәҭа ааглыхра аганахьала еиҳа аҿиара шамоу.

«Ҳара абри адгьылҵакыроуп ҳазҵазкуа. Италиатәи ааглыхра ҷыдарас иамоу – иҿиоу абизнес маҷи абжьаратәи абизнеси роуп, уи шамахамзар, ҭаацәаратә бизнесуп. Ҳделегациа иалоуп аҩқәеи афармацевттә аалыҵи рҭыжьыҩцәа», - иҳәеит асас.

Италиатәи анаплакҩцәа аинвесторцәа рзы ара иҟоу алшарақәа ирызҵаауан, иара убас еиуеиҧшым анаплакратә усхкқәа рзы иаҧҵоу ашәахтә ҭагылазаашьа, аҧсуа економика аҷыдарақәа. Урҭ зҿлымҳара арҭеит аӡахәааӡара, аҩыҟаҵара, аминералтә ӡқәа уҳәа егьырҭ аусхкқәа ирыдҳәалоу Аҧсны зынагӡара алшо апроектқәа.

Аекономика аминистр ихаҭыҧуаҩ Баҭал Ҭарба иазгәеиҭеит зыӡбахә ҳәаз анаплакратә усура аусхкқәа зегьы ҳтәылазы актуалра шрылоу.

«Аҧсны амилаҭтә економика астратегиа, ашәагаа ҳасаб азуны, аекспорт хырхарҭоуп ирымоу. Ҳара алшарақәа аҧаҳҵоит аинвесторцәа анаплакқәа Аҧсны иаҧырҵаларц, нас арантә адәныҟатәи аџьармыкьақәа рахь ицәырҵларц. Аҧсни, Урыстәылатәи Афедерациеи, Шьамтәылатәи Арабтә Республикеи ҳазада ахәаахәҭразы аиқәшаҳаҭра рыбжьоуп, ари Аҧснытәи анаплакқәа Урыстәылеи Шьамтәылеи ртауарқәа рыҭиразы алшара рнаҭоит аҳаза ашәарада», - иҳәеит Баҭал Ҭарба.

Аекономика аминистр ихаҭыҧуаҩ Заур Гәлиа иазгәеиҭеит Аҧсны аинвесторцәа рзы ҷыдалатәи алшарақәа шазҧхьагәаҭоу, максималла азакәанҧҵаратә база бзиагьы шаҧҵоу. Иара убас аинвестициақәа радҧхьаларазы ишаҧҵоу иазгәаҭоу абизнес хықәкқәа рынагӡара иазку Аҳәынҭқарратә инвестициатә усбарҭа.

Аҳәынҭқарратә инвестициатә усбарҭа Адиректор Инар Гицба иҳәеит италиатәи анаплакҩцәа рбизнес проектқәа рынагӡара ацхраара аҭара дшазхиоу. Иара убас Аҳәынҭқарратә инвестициатә усбарҭеи анаплакҩцәеи иазҧхьагәарҭеит асасцәа зҿлымҳара зырҭо ааглыхратә обиектқәа рахь аныҟәарақәа.

Аиҧылара иалахәын иара убас Гал араион Ахада Ҭемыр Надараиеи Аҳәынҭқарратә инвестициатә усбарҭа Адиректор ихаҭыҧуаҩ Симон Агрбеи