Абҵарамза 15 рзы Аҧсны Аҳәынҭқарра Аекономика аминистр Адгәыр Арӡынба идикылеит Ареспублика Крым Ааглыхратә политика аминистр ихаҭыҧуаҩ Иан Латышиови Ареспублика Крым аекономикатә ҿиара аминистр ихаҭыҧуаҩ Светлана Сиротеи алархәны.
Аиҧылара иара убас иалахәын Аҧсны Аҳәынҭқарра Ааглыхратә палата Ахада Тамила Мерцхәылаа, Аекономика аминистр ихаҭыҧуаҩ Баҭал Ҭарба, Аекономика аминистр ицхырааҩ Камилла Гәадалиа, Аекономика аминистрра алицензиаҭара аҟәша аиҳабы Изеҭ Хьыбба.
Аиҧылараҟны аганқәа ахәаахәҭра-економикатә усхк аҟны аусеицура аҧхьаҟатәи аҿиара азҵаарақәа ирылацәажәеит.
Ареспублика Крым Ааглыхратә политика аминистр ихаҭыҧуаҩ Иан Латышиов зҿлымҳара аиҭеит Аҧснынтә аинерттә материалқәа рышьҭра азҵаара.
«Ҳара зҿлымҳара аҳҭоит Аҧснынтә Крымҟа аграниттә хаҳәырҷҷа иацҵаны ҳазнагара азҵаара. Амҽхак ацҵара ахьынӡалшо ҳдыруазар ҳҭахын», - иҳәеит Иан Латышиов.
Аекономика аминистрра алицензиаҭара аҟәша аиҳабы Изеҭ Хьыбба иҳәеит абри аҭакс ареспублика уи аҩыза алшарақәа шамоу атәы.
«Ишыжәдыруеиҧш, уажәы ахаҳәырҷҷа инаҳашьҭуа Крым Таврида автомашьынамҩа аҟаҵара иазкуп. Аматериал ахаҭабзиара ҳаракуп. Аҧсны Аҳәынҭқарраҟны иҟоуп амшынтә баҕәазақәа ҩба, урҭ мызкы 50 нызқь тонна рҟынӡа аужьра рылшоит. Абас еиҧш иҟоу ахаҳәырҷҷа ҭзыжьуа аилахәырақәа хҧа ыҟоуп», - иҳәеит Изеҭ Хьыбба.
Ареспублика Крым аекономикатә ҿиара аминистрра аусзуҩы арҩычага хаҳә аҭыжьразы изҵаара аҭак ҟаҵо, Изеҭ Хьыбба иазгәеиҭеит ари ҧеиҧш змоу зҵаараны ишыҟоу, Аҧсны изхаҭабзиара ҳараку хәарҭара злоу аҵыхтәқәа рацәаны ишыҟоу, аха иахьазы макьана урҭ рҭыжьра ишаламгац Аҧсны.
Аҧсны Аҳәынҭқарра Аекономика аминистр Адгәыр Арӡынба иазгәеиҭеит иара убас даара иаҭахны ишыҟоу апассаџьырмҩангара аусхкгьы.
«Аидарамҩангара атәы акәзар, урҭ рактуалра зыбзоуроу аргылара дуқәа роуп, дара знымзар-зны ихыркәшахоит. Аха апассаџьырцәа рымҩангара ҳзалагар – ари анарха змоу усхкуп», - иҳәеит Адгәыр Арӡынба.
Уи иаҵшьны иҳәеит атуристттә регионқәа рыҟны ари аусхк есқьынгьы иаҭахны ишыҟало.
«Есышықәса Крым иаҭаауа 2,5 млн-ҩык атуристцәеи, Аҧсны есышықәса иаҭаауа 1,5 млн –ҩык атуристцәеи, иара убас Краснодартәи атәылаҿацә иаҭаауагьы нацҵаны – арҭ ахархәаҩцәа рхыҧхьаӡара маҷӡам», - иҳәеит аминистр.
Адәыр Арӡынба Крымнтәи иааз аколлегацәа ирзеиҭеиҳәеит амаршрут иалаҵахо акруизтә ҕба «Аҭауад Владимир» азы имҩаҧысуа аиқәшаҭра ала иааиуа ашықәс азы Аҧсны аҕба адкылара алшо ишыҟало атәы.
Аҧсны Аекономика аминистр игәаанагарала, Амшынеиқәа акурортқәа рыбжьара аицлабра ҟамлароуп.
«Ҳара ҳаидгыланы аус еицаҳуроуп аҳәаанырцәтәи атуризм иалахәу рацлабразы атуристтә џьырмыкьаҟны. Аҧсныҟа иааз атурист Краснодартәи атәылаҿацәи Ареспублика Крыми ркурорттә ҭыҧқәа рахь ицара ырманшәалатәуп», - ҳәа иҧхьаӡоит Адәыр Арӡынба.
Ареспублика Крым аекономикатә ҿиара аминистр ихаҭыҧуаҩ Светлана Сирота иазгәалҭеит сынтәа Крымтәи ацҳа аргылара иабзоураны, адгьылбжьахалахь атуристцәа раара 30% рҟынӡа ишазҳаз.
«Урҭ еиҳарак Краснодартәи атәылаҿацә аҟнытә иааз аҧсшьаҩцәа роуп. Шамахамзар, дара амашьына инақәтәаны, ацҳа иқәсны, мышкы-ҩымш рыла Крым инеиуеит. Аҧсшьаҩцәа рхыҧхьаӡара иацлап ҳәа ҳгәыҕуеит Краснодартәи атәылаҿацә ахь ицо ауаа рыла», - лҳәеит Светлана Сирота.
Аиҧылараҟны иара убас ирылацәажәеит Крым-Аҧснытәи Аустә хеилак аҧҵара азҵаара Ахәаахәҭра-ааглыхратә палата ала, иара убас азеиҧш бизнес-проектқәа рынагӡаразы алҵшәа змоу хырхарҭақәа.
